Thursday, January 22, 2009

زقنبوت

كلمة زقنبوتية تقال غالبا عند الغضب
ويبدو انها كلمة تركية ويقال والله اعلم ان معناها هو زقه نبوتاً اي اعطاه سماً قاتلاً يسمى نبوت وقد تكون هناك اراء اخرى في هذا المجال والذي يهم هنا انها تستخدم غالباً في البيوت العراقية عندما يشعر احدهم ان المقابل قد بدا بازعاجه بكلمات غير مناسبة المعنى او الايقاع ولابد ان اذكر كلمة تركية اخرى وهي قز القرت وهي تؤدي نفس الغرض الزقنبوتي.

Wednesday, January 21, 2009

الشاعر الشعبي الملا عبود الكرخي



الملا عبود الكرخي رحمه الله شاعر شعبي اصيل ومبدع له العديد من المواقف الوطنية. ولد الملا عبود الكرخي سنة 1861 بجانب الكرخ في بغداد ومنها اخذ لقبه وتوفى سنة 1955. له الكثير من القصائد الشعبية المشهورة ومنها قصيدة شعبية اسماها "المجرشة" حيث كتبها سنة 1924 ومن مقاطعها:


ذَبيت روحي عالجرش وأدري الجرش ياذيها

ساعة وأكسر المجرشة وألـعن أبو راعـيها.



ساعة واكسر المجرشة وألـعن أبـو السـواها

إشـجم سـفينة بالبحر يمشي ابعكسها اهـواها

إيصـير أظلّن ياخلكك متـجابلة آنـه ويـاها

كـلما يكـيّرها النـذل آنـي بحيـلي ابريـها



ساعة واكسر المجرشة واكصد أبو الحملة علي

واطلب مرادي وانتحب بلجي هـمومي تـنجلي

نار البـكلبي اسـعرت يهل المروّة وتـصطلي

ما شفـت واحد ينتخي من اهل الرحم يـطفيها.



ساعة واكسر المجرشة وألعن أبو اليـجرش بعد

حظي يهل ودّي نـزل والجايـفه حظها صـعد

سلّمت أمري واسكتـت للي وعدني ابهالـوعـد

نصبر على الدنيه غصب لـلـّحـد وانـباريـها.



ساعة واكسر المجرشه واشغر أنا لسابع سـمه

وادعي على الجان السبب أمـي وأبـوي بالعـمه

أم كَشره وام بـوز الجلب جي يرضه ربي امنعمّه

كـعـدّها بأعلى مرتـبه وجوخ وزري يجـسيها.



ساعة واكسر المجرشه وألعن أبو راعي الجرش

كعـدت ياداده أم البخت خلخالها يدوي ويـدش

وآني استادي لو زعل يمعش شعر راسي معش

هم هاي دنيا وتـنكضي وحسـاب أكـو تـاليها.



ساعة واكسر المجرشه والبس لباس التـنـتنه

جي فوكك درد الله، النذل استادي ضربني بميجنه

بالهيمه عطشان الأسـد والهوش معتـاش ابهنه

هـل مال أبـو هـدلان للدجـله شرب صافيها.



ساعة واكسر المجرشه وانحر على النمسا ومجر

هـناك أنـكر تـبّع وقحطان والطائي ومضر

ترضه يالمسيّر سـفينة نـوح يـا رب البـشـر

عبّـيات ابو ها اكحيله واحضان الجرد يـشـبيها.



ساعة واكسر المجرشه واقسـم أنا بـرب الفـلق

ويللي ابطن الحوت ابن متي النـبي يونـس نطق

كلّه كتبته بالورق عندي فقط إلا الزلق

ما قيدتها بدفتري اوغيري فلا قاريها.



ساعة واكسر المجرشة واكطع من الدنيا الأمل

للجرش ما أرجـع بعد إلا بابره يخـش جمل

كل يوم ناصبلي عزه اسـتادي النغل ما الثوَل

عقلي انذهل جسمي نحل روحي السـكم لافـيها.



ساعة واكسر المجرشة واصعد برجلي للفلك

واوصل السـابع سما وبيـدي ألزمه للملَك

من يوم أمص جمعي، الدهر لاحكك على عمري وكللك

يعبّر عليّ. كل وكت للملعنه يـجزيـها.



ساعة واكسر المجرشـه وانحر على أهل الصيره

وانشد على شيوخ العرب أهـل الشـيم والغـيره

يـرضى إلهي بالرفـاه العـبده أم خـنـفيره

تخدمها حُرّه وكل وكت كاس الصبر تـسكيها.



ساعة واكسر المجرشة وألـعن أبو الكـيّرها

واحـركك أبو كل من ابمنشاره وفاسه انجرها

بعناد هالظالم اسـتا دي رويحتي مرمرها

للكفر يا أهل الرحم إبن الزنـه يقرّيـها.



ساعة واكسر المجرشه وألعن أبو اليكطع مَهر

طفله على شايب هرم يفطن على حفر البحر

وصله سختيانه الوجه واللحية تـشبه للأبـر

الله ما يقبل هالبـشع لرويـحتي سـابـيها.


وكذلك من قصائده المشهورة "بغداد مبنية بتمر" التي نشرها في قصيدة الكرخ سنة 1930 :

بغداد مبنيه بتمر
بغداد مبنية بتمر فلش وكلٌ خستاوي

بغداد مبنية بتمر ما ينكضي هذا العمر
يهواي دبرلي الامر التين اصبح لاوي

بغداد مبنية بلقٌم وتربها (سسي وبطم)
لَلطم على راسي لطم وانحر على المناوي
فلش وكل تين ورطب واخلط التفاح وعنب
يا هل خلك كلبي انعطب بالنار من (عتاوي)

بغداد مرشوشة بعسل واحجارها ثوم وبصل
والماي في (دجلة) وصل ( هذا الكيش حلاوي)
(برحي والبريم ودكل) ماينفعك شغل التمر
بابوجي من جلد الصخل والاجنبي فرنساوي



كان الملا عبود الكرخي متابعاً لما يجري في البلد وهاهو يكتب عن انتخابات المجلس النيابي فيقول في قصيدته "مهازل الانتخابات":

يوليد لا تبلانه بجامع الحيدرخانه

ارجوك لتروح انضبط ليش انت مو واحد سبط
اني وانت ننبسط عشره ولو ويانه
الداعي رحت يوم السبت على النتخاب اتفرجت
مخطوف مرعوب ارجعت عقلي انسلب ايمانه
واكفلك ابنص الدرب يكلك اخذ لا تنضرب
مجبور تاخذها غصب حازب هو واخوانه

ليروح لابد ينجلخ جلخة نظيفه ويندرخ
حصلنه يا كرخي الصلخ يا مرحبه بهالجانه


بعد ان تم نشر قصيدة ( باشا صرت من بشونك ) واغلاق جريدته بسببها ,كتب المله هذه القصيدة "مذكرات خجة خان" بعد ان عادت الجريدة للصدور:

ارجوج ام قدوري جوزي ليسمع نوري
جوزي يام عواشه من الدنبك وخرخاشه
لتسمع اذن الباشا يكاويج اسمعي شوري
لاحلفج بالسادة والمصطفى واولادة
جوزي اتركي داده ومن غير دنبك ثوري
للكرخ سدوها انهجم بيته ولطخ وجهه ابفحم
من ربعه شلع وانهزم ساكن بكهوة حوري
والسبب انتي ودنبكج الله يكافي العلمج
بشغل السيليه شوهدنج صرتيلي ميجر بوري
خجه التخيط والتشك مثلج البلدنبك تدك
وياج انا احجي الصدك مو مثل غيري صوري
اني ادك زنجاري دف ما يسمعه جاري
ولكل حكومه نجاري مو مثل انتي تجوري


اما قصيدة "هذا اليوم ال جنه نريدة" فقد نشرت في الثلاثينات من القرن المنصرم يسخر الشاعر فيها من نواب المجلس وقد اصبح عنوانها شائعاً في اوشاط العراقيينلحد يومنا هذا:

لو هلهلتي يم قدوري وسمعتي يحبيبه شوري
للباشا ريسنه نوري للموطن حيده وصنديده
هذا اليوم الجنا نريده
لو هلهلتي يا عواشه ودكي بالدف وخرخاشه
وادعي ايطول عمر الباشا الله يوفقه الله يزيده



للشاعر الملا عبود الكرخي قصائدعديدة في الغزل حيث تحولت قصائده الى اغاني وبستات تناقلها المطربون وتغنوا بها والى يومنا هذا:

يوليد ياغيد ولك

يوليد ياغيد ولك كلي علي اشبدلك
اشبدلك عني وتشت هل انت بايات اصعدت
ام اني بايات نزلت لو هذا دوران الفلك
هل بالزعل عندك قصد عالداعي ما تقبل تصد
ريكك شهد خدك ورد بحواجبك ناصب شرك

شنهو السبب تنسوني نشرت عام1927 حيث غنى الجزء التالي منهاغناها الكبنجي:

اني ابد منساكم شنهو السبب تنسوني

تنسوني هالصادر زلل مني وصرت عدكم ملل
يكفي اتركو هالزعل ارجوكم تراعوني

يا ولد يابو السدارة نشرت عام 1936 وقد غنيت وانتشرت كثيراً:


ياولد يابو السدارة متيمك سويلة جارة
من تمر سلم علينا ولو يا دعج بالاشارة
سلم ابرمز الحواجب من بعيد ولا تكارب
حيث تدري الواشي ناصب شرك ريت انهجم داره


واخيراً فان للكرخي مجموعات من الإيصير منها، إيصير من تيس الصخل تحلب حليب - إيصير هرفي من الغنم يفترس ذيب - إيصير لحم الجلب طاهر مو نكس - إيصير تعرف داخل الركية - إيصير الجاموس اله جناح ويطير - وإيصير اقوى من الرمح بردية - إيصير تربط البكة بحبل – إيصير سفينة يجرها نمل - إيصير توضع جبل بالقوطية - إيصير تطحنلك صجم برحية - إيصير انا لوتي والعب علحبل – إيصير اختم صنعة اللوتية – إيصير بالجنة الي حورية - إيصير تصعد للسما بسلم درج - إيصير بالمعدان اسم عيشة وعمر - إيصير اموات احتيو من مكبرة - إيصير نملة تدفع الملوية - إيصير بالصيف الظهر الشط جمد - إيصير هر وتاكله جريدية - إيصير ابو جنيب ما يمشي صفح - إيصير بالمرمر يدكون الوتد - إيصير فرخ الجاج يطرد واوي - إيصير سيف تقابلة توثية - إيصير بالبدوان اسم مرزة قلي - إيصير دكولة نعل للخنفسان - إيصير منتفجي تزوج صينية - إيصير بعرور ينزرع يطلع غنم - إيصير يأكل السبع جت وتبن - إيصير من لندن تجي مجاريه - إيصير زبالة الابح يترس قوان - إيصير ساعة بغير ميل وزمبرك - إيصير معمل جام بالهندية - إيصير من الزرباطية يطلع نبي - إيصير اهل كريطعة زرعو طلي - إيصير ما يحسن الربابة كاولي - إيصير تجرش شلب امريكية - إيصير بالدنيا ديج ايبيض - إيصير سيس للرطبة كلك - إيصير سترة بنطرون بليه خياط - إيصير يحجي جرمني الزكروطي - إيصير تعتاش العكاريك بدون مي - إيصير اهل كبيسة حاكو خاولي – إيصير اعمى اخذ ملص بالطاولي - إيصير ابرة بلحظة تحفر بيها بير – إيصير هرش عنبة بالروس يعيش - إيصير تمشي سافرة الحجية - إيصير لاسلكي صنع عيثاوي - إيصير لف عكال يلبس لندني – إيصير احلى من الغزال الشادية - إيصير فخاتي وزاغ يفترس نسور - إيصير انا بالآخرة المس الحور - إيصير زاهد يشرب الشمبانيا - إيصير ناسك يكسر اخمارية - إيصير فيل بالابرة يختفي - إيصير انا بايدي اشك زولية - إيصير يتناطح زلنطح والخروف - إيصير فوك السطح تبني منارة - إيصير معموري صنع طيارة - إيصير انياب السبع عارية - إيصير فحل الجمس عالتيغة مشى - إيصير عل مرمر يزرعون الفجل إيصير اقر واكتب بلا منظرة - إيصير سيكي يستعمل زيان - إيصير شجوه اتخضها سكسونية - إيصير انا لوتي والعب علحبل – إيصير اختم صنعة اللوتية. وأخيرا ايصير نسوان لندن تلبس عبي.


رحم الله الشاعر الملا عبود الكرخي فلقد كان شاعراً شعبياً سريع البديهية ومبدعاً من الطراز الاول.


مقتبس بتصرف من مواقع مختلفة

Tuesday, January 20, 2009

قنقينة

قنقينة لازمة اخرى شائعة ومتدوالة كثيراً حيث انها تستخدم في حالات كثيرة:

1. موظف يسعى الى عرقلة انجاز معاملات المواطنين باختلاق الاعذار الواهية وقد يكون في هذا يريد مالاً او انه في طبع جيناته معرقل،كسول او غير ذلك.

2. زوجة عنيدة لاتطيع زوجها او زوج يحبس انفاس زوجته ويعمل على خلق الصعوبات بوجهها.

3. مدرس لايسعى الى خلق علاقة مودة بينه وبين طلابه فتراه يخلق من المشاكل من حيث تدري ولاتدري.

4. سياسي فاشل يحب الضجيج الفارغ ولاينتج عشر اعشار مايقول فهو قنقينة يزع نفسه والاخرين بلا فائدة تذكر.

هذه امثلة عن استخدام اللازمة قنقينة وبهذا فهي تعني انسان مزعج، عنيد او معرقل لسير الامور بشكل طبيعي.


ومع المحبة والاحترام

Monday, January 19, 2009

What's happening? What's not happening? Shakou Makouشكو ماكو؟

شكو ماكو سؤال له طعم العسل في لهجتنا العراقية الجميلة ولكي ترى ماهية العمل الذي تقوم به هذه اللازمة المحببة دعني انقل لك ماقاله لي احد الاصدقاء في بغداد عندما سألته شكو ماكو:


عيني الحمد لله ابني الجبير محمد اخذ بت هدية الجبيرة سلمى وصار عندة ثلث جهال ابنيتين وولد سماهم سحر، مها واحمد وبناتي كلهن تزوجن سارة اخذها ابن خالتها عبد الرزاق و هاجر اخذت ابن جيرانة عبد الهادي و دنيا اخذت سيد امين وبعدين احنا بعدنة اب بيتنة القديم مشلنه والامور ماشية من تحسن الوضع الامني شوية امور الدكان مشت بس يرادلهة وكت بس تعرف انت هسة مشكلتنا الاساسية الرشاوي يعني شنو معاملة متمشي الا تدفع ميصير حرام لازم يصير حل لازم يلزمون الحرامية وبعدين نسيت اكلك
هذا جيرانة بسام حصل لجوء اب هولندا بس فد مرة ضايج يكول مشية اب سوك الهرج تسوة اللجوء كلة يمعود صدك جذب واحد يعوف الاكو الماكو يابة شنة لجوء والله مااعوف بغداد لو ينطوني مال الدنيا كله وشنو ماتسأل على حجي بدري مو صار تاجر اشكبرة بالشورجة يبيع انواع الفلافل والبهارات كشمش و باكلة وماش وعدس...


وهنا قلت لصديقى العزيز:

عمي دي انطيني درب خل احجي اشو اخذتني حاصل فاصل اب اخبارك الحلوة


وكان هذا السبيل الوحيد لايقاف صديقي الطيب وكما ترى فان شكو ماكو؟ سؤال تاريخي وقائعي شامل يعني ان يقوم متلقي السؤال باعطائك نشرة اخبار العائلة, الاصدقاء والجيران


ياالله افيش على اللهجة العراقية!

مااجملها ومااحلاها